Procedurat e VNM/VSM – analiza, rekomandimet dhe shembujt më të mirë të zbatimit të tyre
Tiranë 22 Dhjetor 2017 - Në kuadër të projektit CO-SEED – “Shoqëria Civile vepron për Zhvillimin Social-Ekonomik mbi Bazat e një Mjedisi të Shëndetshëm”, Instituti për Ruajtjen e Natyrës (INCA), organizoi tryezën e rrumbullakët me përfaqësuesit e AKM, ekspertëve të studimeve të VNM/VSM (Vlerësimi i ndikimit në Mjedis/Vlerësimi Strategjik i Ndikimit në Mjedis) dhe organizatave të shoqërisë civile, me temë “Procedurat e VNM/VSM – analiza, rekomandimet dhe shembujt më të mirë të zbatimit të tyre”.
Në këtë tryezë mori pjesë dhe Drejtori i AKM, Edison Konomi, i cili theksoi se brenda 6 mujorit të parë vitit 2018 do të rishikohen të gjithë procedurat e dhënies së lejeve për studiot e licensuara në përgatitjen e VNM, Vlerësimi i Ndikimit në Mjedis. “Ka një rregull: Kushton më pak ta parandalosh një sëmundje se sa ta kurosh atë dhe unë mendoj se një pjesë e mjedisit është e sëmurë. Atëherë të gjithë së bashku të punojmë që ta shpëtojmë pjesën e shëndetshme dhe ta rikuperojmë pjesën e sëmurë”, tha Konomi.
Në këtë takim drejtori i AKM-së Edison Konomi, siguroi bashkëpunimin mes shoqërisë civile me institucionet përgjegjëse për një proces sa më transparent. Shprehja nga ana tij e gatishmërisë për bashkëpunim të vazhdueshëm në lidhje me përmirësimin e procesit është një fillim i mbarë i komunikimit midis aktorëve të rëndësishëm të këtij procesi.
“Qasja e AKM në miratimin e VNM-ve dhe procedurave të ndikimit në mjedis, është me rëndësi dhe tashmë po punohet për rishikimin e gjithë kuadrit ligjor. Nisur nga zhvillimet e fundit në vend, por dhe nga kërkesat e shoqatave të mjedisit, këto ndërhyrje shihen të nevojshme. Në 6 mujorin e parë të vitit 2018 do të rishikohen procedurat e licensimit të studiove që përgatisin VNM”, tha Konomi.
Ky diskutim me bashkëpunëtorët do të vazhdojë edhe në aktivitetet e mëtejshme të projektit dhe veçanërisht në ato advokuese dhe lobuese për të arritur një proces të rregullt të bërjes së këtyre studimeve duke u shoqëruar dhe me transparencë dhe pjesëmarrje të publikut dhe aktorëve në mënyrë aktive.
Projekti ka për qëllim të nxisë dhe të mundësojë një mjedis ligjor dhe financiar për shoqërinë civile dhe media pluraliste, si dhe fuqizimin e organizatave të shoqërisë civile dhe medias për të qenë aktor të pavarur efikas dhe të përgjegjshëm, dhe për të rritur kapacitetin e tyre për të pasur dialog me qeveritë që ndikojnë proceset e politikave dhe ato vendimmarrëse dhe për t’i bërë ato të përgjegjshme për performancën e tyre ndaj qytetarëve dhe shoqërisë në shkallë të gjerë.
Projekti ka përgatitur gjatë zbatimit të tij raportin e analizës së thelluar të kuadrit ligjor dhe institucional për zbatimin e procedurave të vlerësimit të ndikimit në mjedis të projekteve që ndikojnë në mjedis si dhe të procedurave të vlerësimit strategjik mjedisor të strategjive, programeve dhe planeve të veprimit kombëtare duke evidentuar mangësitë dhe dhënë rekomandimet përkatëse të përmirësimit të këtij kuadri ligjor. Gjithashtu projekti ka përzgjedhur dhe disa shembuj të zbatimit të procedurave të transparencës, informimit të publikut si dhe VNM/VSM në vendet e zhvilluara dhe ato në zhvillim me synimin e prezantimit të këtyre shembujve si praktika të mira që janë për t’u marrë në konsideratë gjatë procesit të advokimit apo lobimit të përmirësimit të kuadrit ligjor dhe zbatueshmërinë e tij.
Duke u nisur nga rëndësia e këtyre problemeve, INCA si partnere e këtij projekti, organizoi këtë tryezë të rrumbullakët për të diskutuar mbi gjetjet nga analiza e kuadrit ligjor dhe institucional të të gjithë procesit të përgatitjes dhe diskutimit të studimeve të VNM dhe VSM në mënyrë që të bashkëpunohet për ta përmirësuar këtë proces duke nxitur advokimin në nivelet e duhura e për ta finalizuar këtë proces dhe me lobim për ndryshimet ligjore që ndikojnë në bërjen e këtij procesi sa më transparent dhe gjithëpërfshirës.
Pjesëmarrësit dhanë gjatë këtij eventi mendimet e tyre për përmirësimin e kuadrit ligjor dhe atë institucional në rritje të pjesëmarrjes të sa më shumë aktorëve, si dhe të rritjes së transparcës dhe pjesëmarrjes në vendimmarrje.
Projekti CO-SEED: po zbatohet në vendet: Shqipëri, Bosnje dhe Hercegovinë, Mal I Zi, Serbi dhe Turqi. Partneri kryesor që drejton zbatimin e projektit (Koordinator) është ËËF Turqi. Partnerët e projektit janë: INCA (Instituti për Ruajtjen e Natyrës në Shqipëri) Shqipëri, Udruga Dinarica, Bosnja dhe Hercegovina, ËËF Adria, Kroaci, Zeleni Dom – Green Home, Mal i Zi dhe Shoqata e Studimeve Shoqërore dhe Mbrojtjes së Shpendëve të Serbisë.
Projekti financohet nga Bashkimi Evropian përmes programit të lehtësimit të Shoqërisë Civile dhe mediave të Bashkimit Evropian 2014-2015 – Mbështetje për rrjetet rajonale tematike të Organizatave të Shoqërisë Civile.
