Rëndësia e restaurimit të zonave ligatinore

Zonat ligatinore kanë një rëndësi të jashtëzakonshme natyrore, jo vetëm për biodiversitetin dhe ekosistemet, por edhe për shërbimet dhe funksionet që ofrojnë për komunitetet lokale. Ndërhyrjet e pakontrolluara që kanë shkaktuar dëmtime dhe fragmentime në këto zona e bëjnë edhe më të domosdoshëm kujdesin dhe mirëmbajtjen e tyre. Një nga proceset më të rëndësishme është restaurimi i ligatinave, për t’u rikthyer atyre funksionet natyrore dhe biodiversitetin, duke ndihmuar transformimin e zonave të dëmtuara në habitate të shëndetshme për speciet vendase.

Rëndësia e restaurimit të zonave ligatinore dhe mënyrat e realizimit të tij ishin në qendër të takimit/trajnimit të organizatave mjedisore, zhvilluar nga 3-5 shkurt 2026 në zonën e Velipojës, një nga ligatinat më të rëndësishme të vendit. Pjesëmarrësit diskutuan për hapat e procesit të restaurimit sipas karakteristikave të veçanta të zonave dhe ndanë praktika të mira nga vende të tjera evropiane dhe të rajonit, të cilat mund të përshtaten edhe në Shqipëri.